میلاد البنفسج

ضمني ریحه ابنص خزنتك أرد أرش روحي اعله هدمك..
جد سریرك رسمه علّگني و وخلهه ابلا إطار..
خوفي تغفا و تالي لیل ایضیج رسمك!

خذني خیط ولفني بکره و خلني للعازه ابکتر
بيّه شد احزام ابرتك لو ردت یم الفتوگ اتسولف أبطاري الستر

الضمني ازرار القمیصك یم ینابیع البنفسج حتّی المهن..
من یسیحن تترس الوادم حمار..
وانت خضره ارویحتك والناس فقره وخاف یغزیهه الصفار!

ضمني طینه ابمزهریتك حتی أمد روحي اویه جذعك والینشدك گلّه طینه
ناس عدهم دندره عشگ البیاض و یم سواد ارواحهم
حچیك رطینه..
من تضیج ارسمني لون أصفر ابشمسك حتی أچفي اسماي بحضانك زراگ
من تِضیج ارسمني ريل و جنطه منسیة اعله راگ

و تسع غربان ال علی أبواب المحطّة امعششات
نشهن و فكّك سراگي أحلام بوب امینزرات
مدني حرثه و اشتل ابصفهه منصّة وإنثر إحذاها المشاعر..
ضمني الله ابحلگ جمهور شاعر..
ضمني ورقة ابجیب شاعر..
ضمني وکسّرني واشبگني ابشطر..
باچر اتلچّك احروفك ..
ضمني نقطة ابدفترك!
وانته تدري ابعازتي عازه ابنهایات السطر..
ضمني حلوی العید میلادك نذر!

اشتراک گذاری:

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *